Vetëm 11 vjeç, Leonis Elezaj nënshkruan kontratë me Nike

Futbollisti i ri me prejardhje nga Kosova po spikat në Gjermani, ndërsa ëndrra e tij është të veshë fanellën e Kombëtares së Kosovës.

Një tjetër histori suksesi vjen nga diaspora shqiptare në Gjermani. Leonis Elezaj, futbollist i talentuar i Akademisë së Hertha BSC, ka arritur një sukses të rëndësishëm në moshë shumë të re, duke nënshkruar kontratë me gjigantin botëror të pajisjeve sportive, Nike, transmeton albinfo.ch. 

Vetëm 11 vjeç, Leonisi konsiderohet ndër futbollistët më të rinj që ka arritur një marrëveshje të këtij niveli, një tregues i potencialit të madh që ai ka shfaqur me paraqitjet e tij në akademinë e klubit berlinez.

Me rastin e ditëlindjes së tij të 11-të, ai u takua me përfaqësues të komunitetit shqiptar në Gjermani, ambasadorin Faruk Ajetin, ku mori dhuratë një top me simbolet e Kosovës. Gjatë takimit, Leonisi shprehu edhe ëndrrën e tij më të madhe – të veshë një ditë fanellën e Kombëtares së Kosovës dhe ta përfaqësojë vendin me krenari në arenën ndërkombëtare.

Historia e Leonis Elezajt është një tjetër dëshmi e talentit dhe potencialit të fëmijëve shqiptarë në diasporë, të cilët po zhvillohen në akademitë e klubeve të njohura evropiane dhe po ndërtojnë një të ardhme premtuese në futboll.

Suksesi i tij përbën një arsye krenarie për komunitetin shqiptar dhe një motivim për brezin e ri të sportistëve që ëndërrojnë të arrijnë majat e futbollit ndërkombëtar./Albinfo.ch

---