U.d. Presidentja Haxhiu liron nga detyra 18 gjyqtarët serbë

Gjyqtarët kishin dhënë dorëheqje në vitin 2022, ndërsa kërkesat e tyre për rikthim në detyrë u refuzuan nga Këshilli Gjyqësor i Kosovës

Ushtruesja e detyrës së Presidentes së Kosovës, Albulena Haxhiu, ka nënshkruar dekretet për lirimin nga detyra të 18 gjyqtarëve nga komuniteti serb, transmeton albinfo.ch.

Vendimi është marrë pas propozimit të Këshillit Gjyqësor të Kosovës (KGJK), i cili kishte refuzuar kërkesat e gjyqtarëve për tërheqjen e dorëheqjeve të paraqitura në vitin 2022.

Gjyqtarët ishin larguar nga sistemi gjyqësor në nëntor të vitit 2022, në kuadër të dorëheqjeve kolektive të pjesëtarëve të komunitetit serb nga institucionet e Kosovës.

Ata më pas kishin kërkuar rikthimin në pozitat e mëparshme, por KGJK-ja, me shumicë votash, e kishte refuzuar kërkesën dhe i kishte propozuar Presidencës lirimin e tyre nga detyra.

Me nënshkrimin e dekreteve nga ushtruesja e detyrës së Presidentes, largimi i tyre nga sistemi gjyqësor formalizohet përfundimisht.

Muajin e kaluar, Haxhiu kishte nënshkruar edhe dekretet për lirimin nga detyra të shtatë prokurorëve serbë, të cilët kishin dhënë dorëheqje në vitin 2022./Albinfo.ch

---