Transporti urban dhe parkingu falas sot në Prishtinë për pjesëmarrësit e “Marshit për Liri”

Qytetarët që do t’i bashkohen marshit mund të udhëtojnë pa pagesë me transportin urban dhe të shfrytëzojnë falas parkingun te Pallati i Rinisë

Transporti urban në Prishtinë do të jetë falas sot, 12 shtator, në ditën kur në kryeqytet mbahet “Marshi për Liri”, përcjell albinfo.ch.

Po ashtu, qytetarët që do të marrin pjesë në marsh mund ta shfrytëzojnë pa pagesë parkingun te Pallati i Rinisë.

Vendimin e ka bërë të ditur kryetari i Prishtinës, Përparim Rama, në kuadër të masave të ndërmarra për lehtësimin e pjesëmarrjes së qytetarëve në këtë organizim.

“Marshi për Liri” do të nisë në orën 14:00 nga sheshi “Skënderbeu” në Prishtinë. Organizatorët kanë njoftuar se për pjesëmarrësit nga qytete të ndryshme të Kosovës është organizuar edhe transport me autobusë.

Në kryeqytet pritet të mblidhen qytetarë nga vende të ndryshme të Kosovës për t’iu bashkuar marshit, i cili organizohet nga platforma “Liria ka Emër” në mbështetje të ish-krerëve të UÇK-së që po gjykohen në Hagë./Albinfo.ch

---