Thurgau: Integrimi lë për të dëshiruar

Hapësirë për veprim në punë të integrimit ka në disa fusha të caktuara për disa komunitete të caktuara, të huaja

Zyra për Migracion e kantonit Thurgau konstaton se ka mangësi në punën e integrimit të të huajve dhe për këtë arsye ajo ka përpiluar një katalog masash në këtë drejtim. Këto masa lidhen edhe me strategjinë për integrim që federata do ta fusë në fuqi nga viti 2014.

Ndërsa në raportin e integrimit që ka përpiluar kantoni, thuhet se integrimi te shumica e popullatës së huaj ka treguar sukses. Për t`u arritur kjo, janë angazhuar prej vitesh organizata shtetërore e joshtetërore. Vetë kantoni, kontribuon financiarisht në projektet për integrimin e të huajve nga viti 2001 ndërsa nga viti 2008 ai ka themeluar Zyrën Profesionale për Integrim. Një kontribut të madh për integrim, thuhet në raport, e kanë dhënë edhe punëdhënësit.

Ndërkaq, hapësirë për veprim në punë të integrimit, dhe për të arritur barazinë e shanseve, sipas raportit, ka në disa fusha të caktuara për disa komunitete të caktuara, të huaja. Ato janë të ballafaquara me më shumë varfëri, me distancim nga shoqëria dhe me shëndet më të dobët.

Një pjesë e detyrimit për integrim më të mirë u takon vetë të huajave. “Integrimi nënkupton gjithmonë një gatishmëri nga të dyja palët. Ai nuk mund të arrihet me urdhër nga shteti”, thotë për “Thurgauer Zeitung” Camillus Guhl, shef i zyrës për migracion të kantonit Thurgau.

“Ne nuk mbajmë ndonjë statistikë mbi dështimet e vetë migrantëve lidhur me integrimin dhe nuk mund të veçojmë as ndonjë komunitet të caktuar në këtë drejtim. Nëse janë mirë ose keq të integruar, kjo ka të bëjë më shumë me veçoritë e njerëzve, si individë”, thotë i deleguari për integrim, Oliver Lind.

Raporti ka konstatuar mangësi edhe në qëndrimin e popullatës vendëse sa i përket ofrimit të kushteve për integrim të mirë të të huajve. Në Thurgau është evidente se ka më pak hapje të vendësve ndaj të huajve. Si ilustrim për këtë mungesë është numri i personave që marrin shtetësinë zvicerane, që është nën mesataren e Zvicrës. Shembulli tjetër ka të bëjë me mundësitë e kufizuara që të huajt të marrin pjesë në jetën politik, thuhet veç tjerash në raport.