Të Gjelbrit me dy kryetare

Delegatët e Partisë së Gjelbër, të shtunën në Gjenevë kanë zgjedhur dy kryetare të partisë, Adèle Thorens (VD) dhe Regula Rytz (BE)

Dy këshilltaret nacionale, Adèle Thorens, me prejardhje nga Lozana si dhe Regula Rytz, nga Berna, janë zgjedhur në Kongresin e Partisë për të udhëhequr Partinë e të Gjelbërve të Zvicrës në mandatin e ardhshëm dyvjeçar.

40-vjeçarja, Adèle Thorens njihet për pragmatizëm. Ajo vlerësohet nga mediet zvicerane si një figurë e nevojshme për një parti politike që është në pritje të ndryshimit karshi ngritjes së partisë konkurrente të të Gjelbërve  liberalë.

Nga ana tjetër, Regula Rytz konsiderohet si një figurë e sigurt, pasi që në funksionin e saj të ekzekutivit në qytetin e Bernës, ajo është e treguar shumë e aftë në udhëheqjen e dosjeve dhe e cila lufton për kauzën ekologjike  .

Gjatë kongresit të djeshëm janë zgjedhur po ashtu edhe katër nën-kryetarë të të gjelbërve : këshilltarët nacional Jo Lang nga Zug-u, Bastien Girod dhe Irène Kalin nga Cyrihu,  si dhe këshilltari i dhomës së shteteve nga Gjeneva, Robert Kramer.

Kreu i ri i partisë, Adèle Thorens dhe Regula Rytz, kanë pasuar kryetarin e deritanishëm Ueli Leuenberger.

Ky i fundit, këshilltar nacional nga Gjeneva, konsiderohet po ashtu edhe mik i madh i shqiptarëve. Ai është themeluesi i Universitetit Popullor Shqiptar si dhe anëtar i Këshillit strategjik të albinfo.ch.

Në mesazhin për delegatët e kongresit, Ueli Leuenberger ka rikujtuar se Partinë e të Gjelbërve e presin shumë sfida, sidomos në lidhje me jo barazitë sociale si dhe ambienti,i cili, sipas tij, po degradohet ditë më shumë.