Sveçla shpallet fajtor për hedhjen e gazit lotsjellës në Kuvendin e Kosovës

Gjykata Themelore në Prishtinë e ka shpallur fajtor ministrin në detyrë të Punëve të Brendshme, Xhelal Sveçla, për hedhjen e gazit lotsjellës në Kuvend në vitin 2018.

Gjykata Themelore në Prishtinë ka shpallur fajtor Xhelal Sveçlën për veprën penale “Përdorimi i armës apo mjetit të rrezikshëm”, lidhur me hedhjen e gazit lotsjellës gjatë seancave të Kuvendit të Kosovës, përcjell albinfo.ch.

Shkalla e dënimit ende nuk është bërë e ditur. Për këtë çështje, më 8 shtator do të mbahet seanca ku palët do të paraqesin rrethanat lehtësuese dhe rënduese, pas së cilës pritet të caktohet dënimi.

Ndërkaq, për veprën penale “Pengimi i personit zyrtar në kryerjen e detyrës zyrtare”, gjykata ka marrë aktgjykim refuzues, pasi ka arritur parashkrimi i ndjekjes penale.

Sveçla nuk ishte i pranishëm në seancën e sotme.

Gjatë procesit gjyqësor, Prokuroria ka paraqitur prova, përfshirë edhe një incizim ku, sipas saj, shihet Sveçla duke aktivizuar një bombolë me gaz lotsjellës dhe duke e hedhur atë në sallën e Kuvendit.

Rasti lidhet me protestat e vitit 2018, kur deputetë të Vetëvendosjes dhe të opozitës së atëhershme përdorën gaz lotsjellës në Kuvend, në shenjë kundërshtimi ndaj marrëveshjes për demarkacionin e kufirit me Malin e Zi.

Çfarë parasheh Kodi Penal?

Sipas dispozitës për “Përdorimin e armës apo mjetit të rrezikshëm”, përdorimi i armës apo materieve plasëse në kundërshtim me ligjin dënohet me burgim prej një deri në tetë vjet.

Në rastet kur arma apo mjeti i rrezikshëm përdoret në mënyrë kërcënuese ose frikësuese, parashihet gjobë deri në 10 mijë euro dhe burgim prej një deri në dhjetë vjet./Albinfo.ch

---