Studentët në Tiranë në mbështetje të gjuhës shqipe në Maqedoninë e Veriut

Në Tiranë është mbajtur një protestë nga studentë të Universitetit të Tiranës dhe Universitetit të Prishtinës, të cilët u mblodhën në sheshin “Skënderbej” në shenjë mbështetjeje për studentët shqiptarë në Maqedoninë e Veriut. Ata kërkojnë që provimet dhe proceset akademike të zhvillohen edhe në gjuhën shqipe.

Me moton “Shqiptaria është me Shkupin”, protestuesit marshuan drejt ambasadës së Maqedonisë së Veriut në Tiranë, duke mbajtur flamuj kombëtarë dhe pankarta me mesazhe solidariteti si “Ne jemi bashkë”. Gjatë tubimit u këndua himni kombëtar dhe u dëgjuan thirrje në mbrojtje të gjuhës shqipe, si dhe u interpretua kënga “Mora fjalë”.

Studentët theksuan se protesta nuk ka karakter politik, por synon vetëm mbrojtjen e të drejtës për përdorimin e gjuhës shqipe në arsimin e lartë në Maqedoninë e Veriut. Sipas tyre, kjo çështje lidhet me barazinë dhe respektin për identitetin gjuhësor.

Një student nga Maqedonia e Veriut u shpreh se kërkesa e tyre ka të bëjë me dinjitetin dhe të drejtat e barabarta, duke theksuar se gjuha shqipe është pjesë e rëndësishme e identitetit të tyre.

Në protestë morën pjesë studentë nga Shqipëria, Kosova dhe Maqedonia e Veriut.