Spanja, finalistja e parë e Botërorit 2026

epa13111623 Pedro Porro (L) of Spain scores the 2-0 goal during the FIFA World Cup 2026 semifinals match France against Spain, in Dallas, USA, 14 July 2026. EPA/SHAWN THEW

Spanja është finalistja e parë e Kupës së Botës 2026, pasi mposhti me autoritet Francën 2-0 në gjysmëfinalen e zhvilluar në Dallas.

Skuadra e Luis de la Fuente zhvilloi një ndeshje të shkëlqyer, duke dominuar kampionët e botës të viteve 1998 dhe 2018. Mikel Oyarzabal hapi serinë e golave në minutën e 22-të nga pika e bardhë, pasi Lamine Yamal u pengua brenda zonës. Golin e dytë e realizoi Pedro Porro në minutën e 58-të, pas një kombinimi të bukur me Dani Olmon.

Vetëm pak minuta më vonë, Yamal realizoi edhe golin e tretë, por ai u anulua për pozicion jashtë loje pas verifikimit, transmeton albinfo.ch.

Franca, e udhëhequr nga Didier Deschamps, nuk arriti të gjente zgjidhje përballë presionit dhe organizimit të shkëlqyer të spanjollëve. Kylian Mbappé dhe shokët e tij krijuan shumë pak raste të rrezikshme, ndërsa portieri Unai Simón ishte pothuajse i papunë gjatë pjesës më të madhe të takimit.

Situata u vështirësua edhe më shumë për francezët pas dëmtimit të mbrojtësit William Saliba në pjesën e parë, ndërsa sulmi i “Les Bleus” mbeti larg pritshmërive.

Me këtë fitore, Spanja siguron biletën për finalen e madhe të 19 korrikut, ku do të përballet me fituesin e gjysmëfinales Angli–Argjentinë. Ndërkohë, Franca do të luajë ndeshjen për vendin e tretë, e cila do të jetë edhe sfida e fundit e Didier Deschamps në stolin e kombëtares franceze.