Si po reagon Gjermania pas vendimit për tërheqjen e 5,000 trupave amerikane

Ministri gjerman i mbrojtjes, Boris Pistorius: Që SHBA të tërhiqte trupat nga Evropa, përfshirë Gjermaninë, ishte e parashikueshme

5,000 trupa amerikane do të tërhiqen nga Gjermania, ku janë të stacionura në kuadër të NATO-s. Siç është njohtuar tashmë, kjo u urdhërua nga Sekretari i Mbrojtjes i SHBA-së Pete Hegseth, sipas departamentit të tij, siç raportohet nga CBS News dhe media të tjera amerikane.

Tërheqja pritet të përfundojë brenda gjashtë deri në dymbëdhjetë muajsh, deklaroi më tej Departamenti i Mbrojtjes, transmeton albinfo.ch. Presidenti i SHBA-së Donald Trump kishte kërcënur me një tërheqje disa ditë më parë pas një komenti të kancelarit gjerman Friedrich Merz në lidhje me Iranin.

Megjithatë, Trump kishte kërcënuar tashmë disa herë me një tërheqje të trupave amerikane nga Gjermania gjatë mandatit të tij të parë. Aktualisht, afërsisht 36,400 trupa amerikane janë të stacionuara në Gjermani.

“Tërheqja e trupave amerikane ishte e parashikueshme”

Gjermania po reagon ndaj tërheqjes së njoftuar të 5,000 trupave amerikane. Prania e ushtarëve amerikanë në Evropë, dhe veçanërisht në Gjermani, është në interes si të Gjermanisë ashtu edhe të SHBA-së, tha Ministri gjerman i Mbrojtjes Boris Pistorius për Agjencinë Gjermane të Shtypit (dpa).

Që SHBA të tërhiqte trupat nga Evropa, përfshirë Gjermaninë, ishte e parashikueshme. Ministri gjerman i Mbrojtjes theksoi gjithashtu, megjithatë, se Evropa duhet të marrë më shumë përgjegjësi për sigurinë e saj.

Gjermania është në rrugën e duhur, sipas Pistorius. Bundeswehr (Forcat e Armatosura Gjermane) po rritet. Pajisjet ushtarake po sigurohen më shpejt dhe infrastruktura po zhvillohet.

 

---