SHBA kërkon formimin e Asociacionit bazuar në Kushtetutën e Kosovës

Përfaqësuesi i SHBA-së në Këshillin e Sigurimit, Jeffrey DeLaurentis, në debatin për Kosovën theksoi qëndrimin amerikan për Asociacionin e komunave me shumicë serbe.

“Shtetet e Bashkuara të Amerikës vazhdojnë të jenë të përkushtuara për stabilitet në Ballkanin Perëndimor, veçanërisht gjatë kësaj kohe të tensioneve në Evropë. Jemi duke punuar me partnerët evropianë për paqe dhe shoqëri multi-etnike dhe sundimit të ligjit në Ballkanin Perëndimor. Shprehim lëvdata për Kosovën dhe Serbinë për marrëveshjet në Bruksel dhe Ohër, si dhe i inkurajojmë Kosovën dhe Serbinë që të lëvizin me shpejtësi për zbatimin e zotimeve të tyre dhe të shmangin krizat që mund të pengojnë progresin. Shpresojmë që të shohim më shumë nga kjo frymë e re në takimin në mes liderëve të Kosovës dhe Serbisë më dy maj. Pjesë e rëndësishme e këtij takimi do të jetë formimi, hapat e mëtutjeshëm të formimit të Asociacionit të komunave me shumicë serbe në mënyrë që është në harmoni me Kushtetutën e Kosovës”, tha ai.