Kryeministri i Kosovës, Albin Kurti, ka pranuar Raportin e sivjetmë për Vendin nga Komisioni Evropian, të cilin ia dorëzoi shefi i Zyrës së Bashkimit Evropian në Kosovë, ambasadori Dirk Schuebel.
Pas takimit bilateral, Kurti dhe Schuebel mbajtën një konferencë të përbashkët për media, ku kryeministri prezantoi vlerësimet e raportit dhe qëndrimin e Qeverisë së Kosovës lidhur me procesin e integrimit evropian.
Kurti deklaroi se Kosova ka shënuar progres në disa fusha, përfshirë sundimin e ligjit, luftën kundër krimit të organizuar, administratën publike, ekonominë, sigurinë dhe lirinë e shprehjes. Sipas tij, raporti nuk evidenton kthim prapa në asnjë fushë të vlerësuar, ndërsa në disa prej tyre konstaton përparim krahasuar me vitin e kaluar.
Ai theksoi se Kosova mbetet e përkushtuar ndaj anëtarësimit në Bashkimin Evropian, duke e cilësuar këtë proces si prioritet strategjik afatgjatë. Megjithatë, Kurti vlerësoi se pozita e vendit në procesin e integrimit nuk e pasqyron progresin e arritur.
Kryeministri rikujtoi se Kosova ka aplikuar për anëtarësim në BE më 15 dhjetor 2022 dhe vazhdon të jetë i vetmi vend në Ballkanin Perëndimor pa statusin e vendit kandidat. Ai përsëriti kërkesën për dorëzimin e pyetësorit nga Bashkimi Evropian, me qëllim të hapjes së rrugës drejt statusit kandidat dhe nisjes së negociatave për anëtarësim.
Në raportin e sivjetmë, sipas Kurtit, janë evidentuar rezultate në luftën kundër krimit të organizuar, ku është ngritur vlerësimi për Kosovën, si dhe në reformën e administratës publike, drejtësi, siguri, shërbime financiare dhe menaxhimin e fondeve evropiane.
Sa i përket luftës kundër korrupsionit, Kurti tha se raporti vëren rritje të vendimeve dhe dënimeve përfundimtare në disa raste, si dhe shtim të raportimeve nga sinjalizuesit. Megjithatë, ai pranoi se rezultatet në rastet e korrupsionit të nivelit të lartë mbeten të pamjaftueshme, duke theksuar se Qeveria do të ndërmarrë masa për forcimin e institucioneve përgjegjëse.
Në fushën ekonomike, kryeministri veçoi rritjen ekonomike prej 5.4 për qind në tremujorin e parë të vitit, borxhin publik prej rreth 16 për qind të Bruto Produktit Vendor dhe rritjen e të hyrave buxhetore prej 8.3 për qind.
Ai përmendi gjithashtu rritjen e pagës minimale në 500 euro nga 1 korriku 2026, zgjerimin e skemës së shtesave për fëmijë, si dhe rezultatet në punësim dhe arsim.
Kurti foli edhe për progresin në fushën e sigurisë, duke theksuar kapacitetet operative dhe hetimore të Policisë së Kosovës, bashkëpunimin me institucionet evropiane dhe përafrimin e plotë të politikës së jashtme dhe të sigurisë së Kosovës me atë të Bashkimit Evropian.
Ndërkohë, kryeministri pranoi se bllokada institucionale e Kuvendit gjatë periudhës raportuese ka ndikuar në ngadalësimin e reformave dhe vonesat në miratimin e disa ligjeve dhe marrëveshjeve të rëndësishme.
Ai bëri të ditur se Qeveria synon të procedojë dhe miratojë një sërë ligjesh që lidhen me sistemin e drejtësisë, punën, sigurinë në punë, komunikimet elektronike, sigurinë kibernetike dhe prokurimin publik.
Në përfundim, Kurti theksoi se Qeveria do të vazhdojë zbatimin e reformave, duke kërkuar nga institucionet e Bashkimit Evropian që të ndërmarrin hapa konkretë për avancimin e Kosovës në procesin e anëtarësimit.
Ai ritheksoi kërkesën për marrjen e statusit të vendit kandidat dhe hapjen e negociatave, duke vlerësuar se reformat evropiane janë të rëndësishme si për integrimin e Kosovës në BE, ashtu edhe për përmirësimin e jetës së qytetarëve.
