SHBA u bën thirrje Kosovës e Serbisë për kompromis

Suksesi në bisedimet mes Kosovës dhe Serbisë në Bruksel është një prioritet absolut i Shteteve të Bashkuara.

Kështu u shpreh zëdhënësi i Departamentit amerikan të Shtetit, Ned Price, gjatë një konference për shtyp mbrëmjen e së mërkurës.

Zyrtari amerikan theksoi se mbështet plotësisht dialogun e ndërmjetësuar nga BE-ja, dhe se palët duhet të shfrytëzojnë këtë mundësi për të avancuar bisedimet për normalizim të marrëdhënieve. “Duam të shohim progres në implementimin e marrëveshjeve të arritura në të kaluarën”, tha ai, transmeton Cnn, përcjell Albinfo.ch.

Price e vuri theksin te nevoja për dialog dhe kompromis, që siç tha, janë elementë thelbësorë të qeverisjes, dhe jo shenjë dobësia. “Ne shpresojmë që liderët e Kosovës dhe Serbisë do të kuptojnë rëndësinë e ecjes përpara, jo prapa, përmes dialogut të ndërmjetësuar nga BE-ja”, vijoi më tej zëdhënësi i DASH-it.

 

 

---