Shaqiri shënon në minutën e gjashtë për fitoren e Bazelit

"Ne treguam kush është shefi këtu", ka thënë me shpoti ylli zvicerano-shqiptar për një televizion zviceran, pas ndeshjes

Në ndeshjen e luajtur mbrëmë, kampioni zyrtar FC Basel mundi me rezultat 4:1 skuadrën nga Cyrihu, Grasshoppers, golin e parë për skuadrën nga Bazeli e ka shënuar Xherdan Shaqiri. Këtë gol të bukur, në minutën e gjashtë të ndeshjes, ai e ka shënuar nga gjuajtja e lirë, duke tejkaluar murin e lojtarëve kundërshtarë.

Siç shkruan blick.ch, ndeshjen e ka ndjekur me emocione edhe asi i tenisit, Roger Federer, i cili është nga Bazeli dhe është fans i FC Basel. Ai, siç është shprehur për medie, ka qenë dukshëm i lehtësuar kur Shaqiri ka shënuar golin e parë. 

“Ne treguam kush është shefi këtu”, ka thënë me shpoti ylli zvicerano-shqiptar për një televizion zviceran, pas ndeshjes.

Golin e dytë, në minutën 19 e ka shënuar Andrist, të tretin, në minutën 26, Alex Frei dhe me golin e katërt, në minutën 77, serisë së golave i ka dhënë fund Fabian Frei.

Për Grasshoppers ka shënuar Toko, në minutën e 88.

Për FC Basel kanë luajtur edhe vëllezërit Xhaka; Graniti është angazhuar që nga fillimi i ndeshjes deri në minutën 61, ndërsa vëllai i tij, Taulanti është futur në lojë në minutën e tetëdhjetë.

Për Grasshopres ka luajtur Orhan Mustafi, i cili është zëvendësuar në minutën 69.