Shaqiri, këtë vit “dimëron” në FC Basel

Për sivjet është mbyllur seria e thashethemeve për shitjen ose jo të Shaqës për skuadrat e mëdha evropiane

“Shikuar nga aspekti sportiv, ne nuk do të dëshironin ma lëshonim, ndërsa nga aspekti financiar nuk po detyrohemi ta lëshojmë”. Me këto fjalë e ka përshkruar shkurtimisht gjendjen rreth yllit të futbollit zviceran, kosovarit Xherdan Shaqiri, nënkryetari i FC Basel, Bernard Heusler.

Me këtë deklaratë ai ka mbyllur si duket përfundimisht për këtë sezon serinë e thashethemeve për shitjen ose jo të Shaqës për skuadrat e mëdha evropiane. Shaqiri pra, përfundimisht, po mbetet në FC Basel dhe në Zvicër.

Skuadrat si ajo gjermane HSV dhe ajo ruse Zenit St. Petersburg nuk kishin dhënë shuma të mjaftueshme për t`ia thyer mendjen talentit të madh të futbollit nga Bazeli.

Konfirmimi për mbetjen edhe një sezon në Bazel, në një formë, ka ardhur edhe nga vetë Xherdan Shaqiri. “Po ndjehem si është më së miri këtu dhe kam edhe kontratën. Tash dëshiroj që me FC Baselin të nis një seri të re”, ka thënë ai për mediet zvicerane.