Sa shpenzuan shqiptarët në turizmin jashtë vendit?

Turizmi gjatë 9-mujorit të këtij viti shënoi tregues pozitivë jo vetëm në kahun hyrës të vizitorëve e turistëve, por edhe shqiptarët rritën shpenzimet për udhëtimet jashtë vendit

Të dhënat zyrtare nga Banka e Shqipërisë tregojnë se në 9-mujorin e këtij viti, shqiptarët shpenzuan rreth 801 milionë euro për udhëtime jashtë vendit, transmeton atsh, përcjell Albinfo.ch.

Krahasuar me vitin pandemik, ky tregues rezulton me rritje, por sërish mbetet 34 % më i ulët se në 9-mujorin 2019.

Daljet e shtetasve shqiptarë ishin 28 % më të ulëta në krahasim me 9-mujorin e 2019-s.

Kufizimi i daljes së shtetasve vendas, ndërkohë që të huajt kishin më shumë liri lëvizjeje bën që bilanci i të ardhurave (diferenca mes shpenzimeve të të huajve në vend dhe atyre të shqiptarëve jashtë) të ishte në nivelin më të lartë, të paktën që nga viti 2008, kur Banka e Shqipërisë raporton të dhënat për 9-mujorin 2021, vendi përjetoi neto nga turizmi 672 milionë euro, ose 63 % më shumë se sa në janar-shtator 2019.

 

---