Rruga drejt Bashkimit Evropian mbetet e vështirë

Procesi dhe rruga drejt anëtarësimit të Kosovës në familjen e madhe evropiane është shumë i vështirë, është thënë në debatin me temën: “Evropa mes meje dhe teje”, organizuar nga Forumi Weltoffen International. Prandaj sipas pjesëmarrësve duhet punuar me përkushtim të madh në përmbushjen e kritereve për anëtarësim.

Pas suksesit në Vjenë, Athinë, Tiranë, Vlorë dhe në disa qytete tjera, Forumi Weltoffen International ka sjellë të shtunën në Prishtinë ciklin e debateve me temën “BE mes meje dhe teje”.

Eurodeputeti, Hanes Svoboda, ka deklaruar se me rëndësi është që çdo ditë nga BE-ja po jepen sinjale se procesi i zgjerimit nuk do të ndalet dhe se do të jetë një proces në vazhdimësi. Ai ka thënë se integrimi i vendeve tjera në BE është me rëndësi edhe për vetë BE-në.

Projekti synon paraqitjen e vizionit të Kosovës 12 vjet pas mbarimit të luftës dhe tri vjet pas shpalljes së pavarësisë. Gjithashtu, nisma ka për qëllim të tregojë se Kosova është shtëpia e përbashkët për të gjithë ata që e shikojnë të ardhmen e tyre të integrimit në familjen e përbashkët evropiane.