Rënia ekonomike – frika kryesore e gjermanëve

FB - Scholz

Kancelari gjerman, Olaf Scholz, dhe ministrat e koalicionit u takuan në Meseberg për të folur për problemet e grindjet brenda koalicionit, për kërcënimin nga recesioni ekonomik dhe se çfarë mund të bëhet kundër kësaj gjendjeje pesimiste brenda ekonomisë gjermane. Përveç kësaj, temë diskutimi ishte edhe performanca e qeverisë së koalicionit me debatet mes ministrave që e kanë dëmtuar imazhin e qeverisë, shkruan DW, përcjell albinfo.ch.

Gjermanët nuk kanë më shumë besim tek koalicioni qeverisës, pasi vetëm 19% e tyre janë të kënaqur me punën e qeverisë, sipas një sondazhi të televizonit ARD, Deutschlandtrend të kryer nga instituti Infratest-Dimap. Për këtë sondazh u pyetën 1310 qytetarë me të drejtë vote, në fund të muajit gusht. Pakënaqësia është e lartë edhe mes përkrahësve të një partie.

Nuk është e pazakontë që qeveritë humbasin mbështetje, kur fillojnë punën e tyre. Megjithatë qeveri të tjera muaj përpara gjysmës së periudhës legjislative kanë arritur ta rifitojnë besimin e qytetarëve ndërsa Qeveria e koalicionit nuk ia ka dalë ende të rifitojë besimin, megjithëse është arritur gjysma e legjislaturës.

Kancelari gjerman vendosi me kabinetin e tij një plan 10-pikësh të fokusit tek ekonomia. Sipërmarrjet do të marrin lehtësime miliardëshe tatimore dhe do të reduktohet burokracia. Masat për rigjallërimin e ekonomisë i përgjigjen edhe shqetësimit kryesor të gjermanëve. Sipas sondazhit të ARD, gjendja ekonomike vlerësohet më negativisht se herët e mëparshme. 73% e të anketuarve e shohin atë si jo të mirë ose të keqe.

Gati gjysma e të anketuarve në 12 muajt e ardhshëm llogarisin keqësim të gjendjes ekonomike, teksa sipas tyre dobësimi ekonomik është problemi më i madh, me të cilin lufton Gjermania aktualisht.