Qeveria Zvicerane, mbledhje krize për gjendjen në Japoni

Ministria e Jashtme u rekomandon të gjithë qytetarëve të Zvicrës të cilët ndodhen në regjionet e prekura nga kriza, të largohen së andejmi

Në një mbledhje krize që ka mbajtur në pasditen e sotme, Qeveria e Zvicrës ka shprehur brengosjen e saj të thellë lidhur me gjendjen aktuale në Japoni. Mbledhja është transmetuar drejtpërdrejtë nga radiot dhe televizionet nacionale të Zvicrës.

Duke iu drejtuar shtetasve të Zvicrës, presidentja e vendit, Micheline Calmy-Rey, ka theksuar se qeveria është e shqetësuar me përmasat e fatkeqësisë në Japoni.

Qeveria me këtë rast u ka shprehur ngushëllime të gjithë të prekurve nga kjo gjendje. Pjesëmarrjen në dhembje, ajo ia ka shprehur edhe Qeverisë së Japonisë, ka thënë Calmy-Rey.

Pasi ka analizuar zhvillimet në Japoni, qeveria ka ardhur në përfundim se kjo gjendje mund të shkojë drejt përkeqësimit të mëtutjeshëm. Sipas Calmy-Rey, qeveria është siguruar se janë ndërmarrë të gjitha masat e mundshme për mbrojtjen e Zvicrës nga pasojat eventuale.

Sidoqoftë, ka thënë Rey, aktualisht Zvicra nuk ndodhet përballë ndonjë rreziku të drejtpërdrejtë. Matjet e radioaktivitetit nuk kanë treguar ndonjë vlerë të shtuar. Nisur nga kjo, nuk shihet e nevojshme marrja e masave të jashtëzakonshme, sidomos jo, sigurimi ose blerja e tabletave të jodit.

Presidentja e vendit ka theksuar gjithashtu se Qeveria Federale informohet rregullisht mbi zhvillimet në Japoni nga Inspektorati Federal për Siguri Nukleare dhe nga Qendra Federale e Alarmit.

Ministria e Jashtme u rekomandon të gjithë qytetarëve të Zvicrës të cilët ndodhen në regjionet e prekura nga kriza, të largohen së andejmi.