Qeveria e Kosovës shpreh mirënjohje për qytetarët që morën pjesë në “Marshin për Liri”

Qeveria e Republikës së Kosovës ka shprehur mirënjohje për mijëra qytetarë që morën pjesë në “Marshin për Liri”, për sjellje paqësore, paraqitje dinjitoze e qëndrime të qarta të shprehura gjatë organizimit.

“Qeveria e Republikës së Kosovës falënderon organizatorët e “Marshit për liri” në Prishtinë. Po ashtu, shprehim mirënjohje edhe për mijëra qytetarë pjesëmarrës, për sjelljen paqësore, paraqitjen dinjitoze dhe qëndrimet e qarta të shprehura gjatë këtij organizimi. Marshi u zhvillua me kërkesën për lirimin e katër drejtuesve të Ushtrisë Çlirimtare të Kosovës, paraburgimi i të cilëve në Dhomat e Specializuara në Hagë ka hyrë në muajin e 70-të. Qeveria vlerëson në veçanti bashkëpunimin e treguar nga organizatorët dhe pjesëmarrësit me organet e rendit dhe të sigurisë të Republikës së Kosovës, i cili kontribuoi në mbarëvajtjen e qetë dhe të sigurt të marshit”, thuhet në një komunikatë për media nga Qeveria, transmeton albinfo.ch.