Prodhuesit kosovarë ekspozojnë në Panairin e Uniformave në Bernë

Tre prodhues kosovarë të rrobave të punës do t’i ekspozojnë produktet e tyre në Panairin Kombëtar për Promovimin e Sigurisë në Punë, Mbrojtjes së Shëndetit dhe Shëndetit në Vendin e Punës në Bernë, Zvicër, raporton albinfo.ch.

Ky panair që do të mbahet nga 22 deri 24 qershor në Bernë është ngjarje dyvjeçare që u dedikohet rrobave për shëndetin, sigurinë dhe sigurimin e punëtorëve, përfshirë rrobat e punës dhe rrobat mbrojtëse.

“Ekspozimi në panair ua jep kompanive kosovare një shans për të përfituar njohuri për trendet e produkteve dhe tregut dhe për të lidhur kontakte me blerësit dhe agjentët për të ardhmen”, thotë Agron Morina, Drejtor Ekzekutiv i Shoqatës së Kosovës për Marketing të Veshmbathjeve, përcjell albinfo.ch.

Kompanitë ekspozuese janë “Arta Tex”, “Puntex”, dhe “Fashion Network”, që të gjitha specializojnë në
prodhimin e uniformave dhe rrobave të punës për sektorë të ndryshëm.

Ky aktivitet mbështetet nga EMPOWER Sektori Privat i USAID-it, Agjencia për Investime dhe Përkrahjen e Ndërmarrjeve në Kosovë dhe kompanitë ekspozuese.

Shoqata Kosovare për Marketing të Veshmbathjeve (SHKMV) u themelua në vitin 2015.

Qëllimi kryesor i SHKMV-së është të promovojë  rrjetëzimin midis bizneseve vendore dhe ndërkombëtare në sektorin e  veshmbathjeve  dhe  promovon industrinë kosovare të veshmbathjeve në vend dhe ndërkombëtarisht, me synimin që të rrisë eksportin, thuhet në njoftim.

Më shumë për panairin:

http://www.arbeits-sicherheit-schweiz.ch/content/index_ger.html