Pranohet iniciativa për pagën minimale

Iniciativa kërkon që në marrëveshjet kolektive të përcaktohet paga minimale prej 22 frangash për një orë pune

Zviceranët me të drejtë vote do të mund të dalin në votime për përcaktimin e pagës minimale. Kjo është bërë e mundur pas pranimit në procedim nga organet kompetente të iniciativës “Për mbrojtjen e pagave korrekte”.

Nga gjithsej 112.712 nënshkrimet grumbulluara , 112.301 janë të vlefshme, ka njoftuar zyra federale sot. Iniciativa qe dorëzuar më 23 janar 2012 njofton swissinfo.ch.

Njerëzit që punojnë me orar të plotë duhet të kenë mundësi edhe të jetojnë nga ajo punë, thonë iniciuesit. Mirëpo, kjo gjë është gjithnjë e më pak e mundur, thotë federata e sindikatave zvicerane. Sipas saj viteve të fundit është ngritur presioni mbi pagat ndërkohë që kostoja e jetës është rritur.

Iniciativa kërkon që në marrëveshjet kolektive të përcaktohet paga minimale prej 22 frangash për një orë pune.

400.000 njerëz, dy të tretat femra, sipas federatës në fjalë fitojnë më pak se 4000 franga në muaj. Kjo shumë duhet të jetë edhe kufiri i poshtëm i pranueshëm që do të fiksohej pas pranimit të iniciativës.