Policia e Kosovës dhe autoritetet zvicerane realizojnë operacion policor

Policia e Kosovës dhe autoritetet zviceranë janë duke bashkëpunuar për të lokalizuar personat që kanë kryer vepra penale në Zvicër.

Gjatë së martës, Policia e Kosovës ka njoftuar se janë kryer disa kontrolle në lokacione të ndryshme.

“Policia e Kosovës, përkatësisht Drejtoria e Hetimit të Krimeve Kibernetike, dhe Prokuroria Speciale e Republikës së Kosovës, në kuadër të bashkëpunimit ndërkombëtar dhe me prezencën edhe të autoriteteve zvicerane, sot kanë realizuar një operacion policor për zbatimin e urdhrit të Gjykatës Themelore Prishtinë – Departamenti Special. Gjatë operacionit policor, janë kryer kontrolle në katër lokacione të ndryshme në Kosovë. Urdhri për kontroll është lëshuar bazuar në kërkesën përmes Ndihmës Juridike Ndërkombëtare të autoriteteve zvicerane”, thuhet në njoftim përcjell albinfo.ch.

Rasti ka të bëjë me veprën penale të mashtrimit.

“Rasti ka të bëjë me disa të pandehur ndaj të cilëve autoritetet zvicerane janë duke zhvilluar procedurë penale me dyshimin se të pandehurit kanë kryer apo janë të përfshirë në vepra penale të mashtrimit përmes sistemeve kompjuterike, ku të dëmtuarit janë personat që jetojnë në Zvicër”, njoftohet nga Policia, përcjell albinfo.ch.

Gjatë këtij operacioni janë sekuestruar prova relevante, rasti është ende në proces hetimor dhe bashkëpunimi ndërmjet autoriteteve do të vazhdojë për trajtim të mëtutjeshëm të rastit.