Përkujtojnë Rinorin

Ishin mbledhur të dielën për të përkujtuar shokun e tyre, Rinor Rrecaj, i cili në Brunnen, kantoni Schwyz, në natën e të enjtes ishte aksidentuar për vdekje me motoçikletën e tij.

Shokët e Rinorit kanë organizuar një parakalim të zisë me motorët e tyre në shenjë përkujtimi në vendin ku kishte ndodhur aksidenti fatal.

”Për Rinin”, e kishin quajtur parakalimin e së dielës shokët e Rinorit.

I riu shqiptar, ngasës i motoçikletës, pasi ka hyrë në kahun e gabuar të rrugës, ka humbur kontrollin mbi motorin e tij dhe është përplasur me një makinë transportuese në afërsi të stacionit hekurudhor të qytetit.

Me këtë rast i riu ka marrë plagë të rënda dhe përkundër ndërhyrjes së shpejtë të ndihmës së parë, ka ndërruar jetë.
Rrecaj ishte me origjinë nga Llausha e Drenicës, ndërsa ka jetuar me familjen në Lucern të Zvicrës. Rrecaj sapo kishte përfunduar shërbimin ushtarak.