Instituti Federal Politeknik i Lozanës (EPFL) ka njoftuar hapjen e një programi të ri universitar Bachelor në Inteligjencë Artificiale (AI), i cili do të nisë në vjeshtën e vitit 2027.
Ky do të jetë programi i parë i këtij niveli i dedikuar inteligjencës artificiale në Zvicrën frëngjishtfolëse, duke shënuar një hap të rëndësishëm në zhvillimin e arsimit të lartë dhe teknologjisë në vend, transmeton albinfo.ch.
Programi do të zgjasë tre vjet dhe synon përgatitjen e specialistëve të rinj, të aftë jo vetëm të përdorin teknologjitë ekzistuese të inteligjencës artificiale, por edhe të zhvillojnë sisteme dhe zgjidhje të reja teknologjike.
Gjatë vitit të parë, studentët do të ndjekin lëndë të përbashkëta me programin e shkencave kompjuterike, duke përfshirë matematikën, fizikën dhe programimin. Nga viti i dytë, studimet do të përqendrohen në fusha më të specializuara, si algoritmet, mësimi makinerik, robotika dhe modelet e avancuara të inteligjencës artificiale.
Një element i rëndësishëm i programit do të jetë edhe trajtimi i çështjeve etike dhe shoqërore që lidhen me përdorimin e inteligjencës artificiale. Studentët do të mësojnë të vlerësojnë ndikimin e këtyre teknologjive në shoqëri, përfshirë çështjet e përgjegjësisë, drejtësisë dhe transparencës.
Sa i përket gjuhës së mësimit, gjatë vitit të parë programimi do të zhvillohet në frëngjisht, ndërsa për matematikën dhe fizikën studentët do të kenë mundësi të zgjedhin ndërmjet frëngjishtes dhe anglishtes. Viti i dytë dhe i tretë do të zhvillohen tërësisht në gjuhën angleze.
Sipas Nicolas Grandjean, zëvendëspresident për arsim në EPFL, qëllimi i këtij programi është përgatitja e inxhinierëve dhe ekspertëve që i nevojiten Zvicrës për t’iu përgjigjur zhvillimeve të shpejta teknologjike.
Nisma vjen në një periudhë kur inteligjenca artificiale po fiton rol gjithnjë e më të madh në ekonomi, industri, shëndetësi dhe kërkime shkencore. Përmes këtij programi, EPFL synon të kontribuojë në formimin e një gjenerate të re profesionistësh, të cilët do të jenë në gjendje të zhvillojnë teknologjitë e së ardhmes dhe të forcojnë pozitën e Zvicrës në fushën e inovacionit.
