Përdori ChatGPT për mbrojtjen e tij dhe doli fitues në një gjykatë gjermane

Një rojë sigurie nga Gjermania përdori ChatGPT për të përgatitur mbrojtjen e tij në një proces penal, pasi nuk kishte mundësi të paguante një avokat. Në fund, procedura u mbyll në favor të tij, duke nxitur debat mbi rolin e inteligjencës artificiale në sistemin e drejtësisë.

Një rast i pazakontë në Gjermani ka tërhequr vëmendjen e publikut, pasi një rojë sigurie 41-vjeçar nga Lajpcigu përdori ChatGPT për të përgatitur mbrojtjen e tij në një proces penal dhe në fund arriti të dalë fitues në gjykatë.

Historia nisi në vitin 2023, kur ai filloi një vend pune një javë më herët sesa ishte planifikuar. Edhe pse kishte njoftuar autoritetet për ndryshimin e statusit të tij, për shkak të një gabimi administrativ përfitoi 242.34 euro pagesë papunësie më shumë. Për këtë arsye, ndaj tij u ngrit një akuzë për mashtrim dhe iu shqiptua një urdhër penal me gjobë.

Në pamundësi për të përballuar shpenzimet e një avokati dhe pasi nuk përfitoi ndihmë juridike falas, ai vendosi të përdorte ChatGPT për të kuptuar procedurat ligjore dhe për të përgatitur dokumentet e nevojshme për mbrojtjen e tij.

Me ndihmën e inteligjencës artificiale, ai hartoi kundërshtimet ndaj akuzës, analizoi bazën ligjore të çështjes dhe përgatiti edhe një kërkesë të detajuar për përjashtimin e gjyqtarit nga procesi. Kërkesa u pranua dhe çështja iu kalua një gjyqtari tjetër.

Pas shqyrtimit të rastit, prokuroria vendosi të mos e vazhdonte procedurën, ndërsa gjykata e mbylli çështjen pa dënim dhe pa pasoja në regjistrin penal të 41-vjeçarit. Vendimi i mundësoi atij të ruante vendin e punës si rojë sigurie, profesion për të cilin kërkohet një dëshmi e pastër penaliteti.

Rasti ka nxitur debat në Gjermani mbi mundësitë që inteligjenca artificiale u ofron qytetarëve për t’u informuar dhe për të përgatitur dokumente ligjore. Megjithatë, ekspertët theksojnë se mjete si ChatGPT mund të ndihmojnë në orientimin dhe përgatitjen fillestare të dokumenteve, por nuk mund të zëvendësojnë këshillimin profesional të një avokati, pasi përgjigjet e inteligjencës artificiale duhet gjithmonë të verifikohen.

---