Për dy vjet, mbi 300 persona humbën jetën në aksidente

Instituti Kombëtar i Shëndetësisë Publike i Kosovës (IKSHP) ka shprehur shqetësimin e thellë lidhur me numrin e lartë të aksidenteve të trafikut me fatalitet, ku vetëm gjatë pesë muajve të parë të këtij viti kanë humbur jetën mbi 30 persona.

Sipas IKSHP-së, nga 1 janari i vitit 2017 në aksidente rrugore kanë humbur jetën mbi 300 persona, prej tyre 137 kanë vdekur më 2017, 129 më 2018, përcjell albinfo.ch.

“Shkaqet janë të ndryshme, por sigurisht se faktori njeri është më i shpeshtë, pasi që nuk janë duke u respektuar rregullat e përgjithshme në trafik, por duke mos munguar as faktori rrugë dhe automjet, pasi në shumë vende mungojnë shenjat e komunikacionit dhe veturat e vjetra me mangësi të shumta teknike”, thuhet në reagim.

Me këtë rast, Instituti Kombëtar i Shëndetësisë Publike i Kosovës ka dhënë disa rekomandime, me qëllim të parandalimit të aksidenteve në trafik:

• Përpilimi i një plani të veprimit për parandalimin e aksidenteve dhe aprovimi me procedura urgjente nga Parlamenti i Kosovës.

• Zbatimi me rigorozitet i Ligjit për komunikacionin deri në ndalesën e vozitjes për shkelje të rënda të përsëritura.

• Me programe të ndryshme edukativo–informative të vetëdijesohen njerëzit, e posaçërisht vozitësit për rolin e tyre në parandalimin e aksidenteve, të cilat ndodhin si pasojë e gabimeve të tyre si dhe aftësimi për të ofruar ndihmën e parë.

• Angazhimi i masmediave në kampanja të ndryshme që kanë për qëllim parandalimin e aksidenteve.

• Me fillimin e vitit të ri shkollor të sensibilizohet çështja e sigurisë së fëmijëve në komunikacion duke organizuar orë edukativo – arsimore për sjelljen e këmbësorëve në komunikacion, mësimi sistematik i rregullave të komunikacionit.

• Largimi i menjëhershëm i automjeteve të vjetra nga qarkullimi, kontrolli teknik rigoroz i të gjitha automjeteve.

• Kontrollimet mjekësore të rregullta, periodike dhe plotësuese me vlerësim rigoroz të shëndetit mendor të vozitësve që kanë bërë shkelje të rënda të njëpasnjëshme.

• Të rregullohet infrastruktura rrugore, të bëhet mirëmbajtja e rrugëve, të kompletohet sinjalizimi dhe respektimi rigoroz i rregullave të parkimit të veturave.

• Drejtuesit e automjeteve t’u përmbahen me përpikëri shenjave të komunikacionit dhe kodit të mirësjelljes qytetare.

• Inspektimi rigoroz i autoshkollave dhe kritereve për marrjen e patentë shoferëve.

• Këmbësorët të respektojnë shenjat e komunikacionit.

“Ekspertët e Institutit Kombëtar alarmojnë dhe paralajmërojnë se nëse nuk merren masa urgjente, humbja e pritshme e jetëgjatësisë së banorëve do të jetë enorme, andaj apelon te të gjithë qytetarët të kenë shumë kujdes gjatë drejtimit të automjeteve, pasi automjeti është armë vrasëse që merr viktima të pafajshme”, përfundon njoftimi.

---