Parlamenti gjerman do të debatojë ligjin e dyshtetësisë

Reformat e shumëpritura të shtetësisë në Gjermani do të kenë leximin e parë në Bundestag në javën e dytë të nëntorit, sipas Ministrisë së Brendshme.

Pas kalimit të një votimi në kabinet në muajin gusht, propozimet për lehtësimin e shtetësisë do të shkojnë në një lexim të parë në Bundestag më 9 ose 10 nëntor, sipas TheLocal.

Kjo shënon fazën e parë të miratimit të një projektligji që do të lehtësojë ndjeshëm procesin e natyralizimit për të huajt.

Hakan Demir, një politikan i SPD-së që ka punuar për zhvillimin e ligjit të ri, përcaktoi afatin kohor të parashikuar në përgjigje të një pyetjeje parlamentare, të cilit iu përgjigj në fund të shtatorit.

“Sipas Ministrisë Federale të Brendshme, leximi i parë në Bundestag do të bëhet më 9 ose 10 nëntor”, ka shkruar ai.

Ky është hapi i parë në procesin e shqyrtimit parlamentar përpara se projektligji të mund të votohet nga dhomat e ulëta dhe të larta të parlamentit: Bundestagu dhe Bundesrat, shkruan albinfo.ch.

Sipas tij, rrugët më të shpejta për të fituar nënshtetësinë gjermane dhe lejimin e shtetësisë së dyfishtë mund të bëhen më pas realitet deri në pranverën e ardhshme.

“Është planifikuar që reforma e shtetësisë më pas të hyjë në fuqi në prill 2024 – dhe se kjo do të mundësojë gjithashtu shtetësi të shumta dhe natyralizim të përshpejtuar”, shpjegoi ai.

Ndër paketën gjithëpërfshirëse të reformave janë planet për të reduktuar kërkesat e qëndrimit në Gjermani në pesë vjet në rastet e zakonshme dhe në tre në rastet e integrimit të veçantë dhe aftësive të avancuara të gjuhës gjermane.

Personave mbi 67 vjeç nuk do t’u kërkohet më të marrin pjesë në një provim zyrtar të gjuhës B1 kur aplikojnë për shtetësi.

Në vend të kësaj, autoritetet thjesht do të vlerësojnë nëse janë në gjendje të komunikojnë me kompetencë në gjermanisht.

Përveç kësaj, njerëzit nga vendet jo anëtare të Bashkimit Evropian do të lejohen të mbajnë më shumë se një kombësi, që do të thotë se dikush nga Australia ose Turqia, për shembull, nuk do të duhet të heqë dorë nga pasaportat e tyre ekzistuese për të fituar një gjermane.

Në një konferencë shtypi duke njoftuar ndryshimet në gusht, Ministrja e Brendshme, Nansi Faeser (SPD), tha se reformat do të krijonin “një ligj modern natyralizimi që është i denjë për shoqërinë tonë të larmishme”.

Lejimi i mbajtjes së shtetësive të shumëfishta do të ndihmojë në korrigjimin e viteve të trajtimit të padrejtë të popullatës së huaj, veçanërisht brezi i punëtorëve mysafirë turq që mbërriti në Gjermani në vitet 1950 dhe 60, tha Faeser.

Megjithatë, kritikët e CDU-së konservatore kanë akuzuar qeverinë se dëshiron të “fshijë” pasaportat gjermane dhe të ulë barrierat ndaj integrimit.

Gjithashtu ka pasur polemika mbi planet për të shtrënguar kërkesat financiare për të huajt që duan të fitojnë shtetësinë gjermane.

Në të ardhmen, shumica e aplikantëve do të duhet të dëshmojnë se mund të mbështesin veten dhe familjet e tyre pa u mbështetur në mbështetjen sociale, si p.sh. përfitimet e papunësisë ose kompensimi për strehim.

Sipas kritikëve, kjo mund të diskriminojë njerëzit me fëmijë të vegjël ose ata me aftësi të kufizuara afatgjata.

---