Paguajnë 2600 euro për trafikantët dhe sërish dëbohen në Kosovë

Kishin paguar nga 1000 euro secili për rrugën nga Kosova në Austri dhe 600 euro për rrugën e mbetur në gjysmë për në Gjermani

Një taksist nga Vjena është kapur nga policia me dyshimin se ka bërë trafikimin e dy kosovarëve për në kufirin me Gjermaninë. Ai i ka marrë në veturën e tij dy personat që nuk kishin as vizë dhe as dokumentacion të vlefshëm dhe, pasi u ka kërkuar 600 euro është nisur për në Gjermani. Por të tre janë zënë nga policia austriake në vendkalimin kufitar Walserberg (Flachgau).

Në mbrojtjen e tij, taksisti austriak ka thënë se për të, prioritet kanë pasur të hollat e fituara. Ai është lënë i lirë, pasi që i janë konfiskuar 600 eurot e marra nga dy kosovarët, por ndaj tij do të ngrihet padi penale. Dy kosovarët ndërkaq po mbahen në burg, për të siguruar kështu mundësinë e dëbimit të tyre në Kosovë.

Siç merr vesh policia dhe transmetojnë mediet austriake e gjermane (ORF.at etj.), shtetasit e Kosovës kishin paguar nga 1000 euro secili për rrugën e bërë nga Kosova në Austri dhe 600 euro për rrugën e mbetur në gjysmë nga Austria në Gjermani!