Pacientët me kancer në Zvicër mund të mbeten pa një ilaç të ri premtues

Politika amerikane e çmimeve të barnave mund të ndikojë edhe në tregun zviceran, duke rrezikuar qasjen në një medikament të ri për kancerin e pankreasit.

Pacientët në Zvicër mund të përballen me vështirësi në qasjen ndaj një ilaçi të ri premtues për trajtimin e kancerit të pankreasit, si pasojë e politikës së re amerikane për çmimet e barnave, transmeton albinfo.ch.

Presidenti amerikan Donald Trump po ushtron presion ndaj industrisë farmaceutike që barnat në vendet e industrializuara të mos shiten me çmime më të ulëta sesa në Shtetet e Bashkuara.

Kjo politikë mund të ketë pasoja edhe për tregun zviceran. Në mesin e medikamenteve që mund të preken është Daraxonrasib, një trajtim i ri që konsiderohet premtues për pacientët me kancer të pankreasit.

Rrezikon të mos jetë i disponueshëm në Zvicër

Për shkak të presionit mbi kompanitë farmaceutike lidhur me çmimet ndërkombëtare, ky medikament rrezikon të mos jetë i disponueshëm për pacientët zviceranë në një periudhë afatmesme.

Ekspertët paralajmërojnë se problemi mund të mos kufizohet vetëm te ky ilaç. Edhe medikamente të tjera të reja mund të mos futen në tregje ku çmimet janë më të ulëta në krahasim me SHBA-në.

Situata ka ngritur shqetësime për pasojat që politika amerikane e çmimeve mund të ketë te pacientët në vendet e tjera, përfshirë Zvicrën, veçanërisht kur bëhet fjalë për trajtime të reja për sëmundje të rënda./Albinfo.ch

---