Nuk ka pagesë pa kufi për personat me aftësi të kufizuara!

Personat me aftësi të kufizuara nuk kanë të drejtë për përfitimet suplementare pa kufi, për përkujdesje dhe kujdestari në shtëpi, ka vendosur Gjykata Federale e Zvicrës.

Një vendim të tillë gjykata e ka marrë duke iu referuar rastit të një invalidi nga kantoni i  Shvicit, i cili jeton te prindërit. Fondi i Kompensimit në nivel të kantonit atij ia kishte ndërprerë përfitimet suplementare në momentin kur ato kishin mbërritur shkallën maksimale vjetore prej 90 mijë frangash.

Në ankesën e tij, invalidi ka theksuar se, sikur të banonte në një qendër për përkujdesjen e personave me aftësi të kufizuara, sigurimi social do t`i merrte mbi vete të gjitha shpenzimet, në kuptimin që kjo shumë do të tejkalohej. Mirëpo, përgjigja e Gjykatës Federale ka qenë se kjo nuk nënkupton që pagesa për përkujdesjen në shtëpi të një invalidi të jetë e pakufizuar.