Një shqiptar në krye të Komisionit Suprem për Barazi dhe Integrim Shoqëror në Gjermani

Berat Arifi, sukses i diasporës shqiptare në politikën lokale gjermane

27-vjeçari Berat Arifi nga SPD është zgjedhur unanimisht kryetar i Komisionit Suprem për Barazi Strategjike dhe Integrim Shoqëror në Gelsenkirchen. Me këtë vendim, SPD dërgon një mesazh të qartë për drejtësi sociale, përfaqësim dhe pjesëmarrje demokratike në një shoqëri të larmishme urbane, transmeton albinfo.ch.

Zgjedhja e Arifit përbën një moment të rëndësishëm për diasporën shqiptare në Gjermani, duke dëshmuar rolin aktiv të brezit të dytë të familjeve me histori migrimi në institucionet vendimmarrëse të vendit.

Me prejardhje nga Lipjani i Kosovës, Arifi vjen nga një familje refugjatësh lufte të viteve 1998/1999. Ai ka qenë anëtar i Këshillit të Integrimit në legjislaturën e kaluar dhe aktualisht punon si këshilltar politik për siguri dhe integrim në Ministrinë e Punëve të Brendshme të Nordrhein-Westfalen-it, transmeton tutje albinfo.ch.

Komisioni, i njohur më herët si Këshilli i Integrimit, është organi kryesor për hartimin dhe bashkëformësimin e politikave të integrimit në Gelsenkirchen, ndërsa Arifi mban njëkohësisht edhe postin e kryetarit të Jusos në këtë qytet./Albinfo.ch

---