Nis votimi me postë për diasporën, KQZ publikon udhëzimet për qytetarët jashtë vendit

Rreth 105 mijë pako me fletëvotime do të shpërndahen deri më 6 qershor 2026

Komisioni Qendror i Zgjedhjeve ka njoftuar se nga sot, 21 maj, ka nisur zyrtarisht periudha e votimit përmes postës për qytetarët e Kosovës që janë regjistruar për të votuar nga jashtë vendit. Ky proces do të zgjasë deri më 6 qershor 2026, shkruan albinfo.ch.

Sipas KQZ-së, gjatë kësaj periudhe pritet të shpërndahen rreth 105 mijë pako me fletëvotime për votuesit e diasporës.

Përmes një njoftimi publik, institucioni ka sqaruar procedurat që duhet të ndjekin qytetarët pas pranimit të pakos në adresën e tyre të banimit.

Pas marrjes së pakos, votuesit duhet të plotësojnë fletëvotimin dhe ta vendosin atë në zarfin e fshehtësisë. Më pas, zarfi i fshehtësisë së bashku me dëftesën e regjistrimit duhet të futen në zarfin kthyes.

KQZ ka theksuar se qytetarët duhet të shënojnë saktë adresën e kutisë postare përkatëse dhe ta dërgojnë zarfin përmes postës, duke siguruar që ai të arrijë në destinacion jo më larg se data 6 qershor 2026. /Albinfo.ch

---