Ngjarje e rëndë në Kosovë: Një person djeg motrën dhe sulmon nënën në Klinë

Një ngjarje e rëndë ka ndodhur në fshatin Poterq të Klinës, ku një person dyshohet se i ka vënë zjarrin shtratit ku ndodhej motra e tij dhe më pas ka sulmuar nënën me mjete të forta.

Të dyja viktimat u dërguan fillimisht në Spitalin e Pejës dhe më pas u transferuan në Qendrën Klinike Universitare të Kosovës në Prishtinë, për shkak të gjendjes së rëndë shëndetësore.

Motra nuk ka arritur t’u mbijetojë plagëve të marra dhe ka ndërruar jetë në Prishtinë.

Ndërkohë, i dyshuari është ndaluar për 48 orë me urdhër të prokurorit të shtetit. Ai është vendosur në repartin e psikiatrisë në Spitalin Rajonal të Pejës, nën kujdes mjekësor dhe mbikëqyrje policore.