Nejtën Klevërly nuk do të përballet me Robin Krasniqin

Takimi Klevërly – Krasniqi është dashur të zhvillohet në Rojal Albert Holl, të shtunën, më 28 të këtij muaji

Boksieri profesionist nga Kosova, me qëndrim në Gjermani, Robin (i njohur edhe si Haxhi) Krasniqi nuk do të përballet javën e ardhshme në Londër me boksierin britanik, Nejtën Klevërly.

Ky i fundit është tërhequr nga mbrojtja e planifikuar e titullit të kampionit në kategorinë gjysmë të rëndë në verzionin WBO (World Boxing Organisation) për shkak të një infekcioni viral.

Takimi Klevërly – Krasniqi është dashur të zhvillohet në Rojal Albert Holl, të shtunën, më 28 të këtij muaji.

Klevërly tha sot se nuk ishte në gjendje që të stërvisë për takimin me Robin Krasniqin, që parashihej të ishte meçi i katërt për mbrojtjen e titullit për këtë boksier britanik.

Boksieri Robin Krasniqi, i njohur edhe si Haxhi Krasniqi, është 25 vjeçar dhe bokson profesionalisht në Munih të Gjermanisë. Ai ka radhitur fitoren e 37 nga gjithsej 39 meçe të tij në karrierën profesioniste.

Haxhiu i lindur në Junik të Kosovës dhe është kushëri i largët i boksierit të njohur Luan Krasniqi.