Ndërpritet sërish seanca konstituive, PDK-ja lëshon sallën pas mosvotimit të Çitakut

VV-ja abstenoi në votimin për kandidaten e PDK-së për nënkryetare, Vlora Çitaku, ndërsa seanca pritet të vazhdojë sot në orën 14:00

Vazhdimi i seancës konstituive të Kuvendit të Kosovës është ndërprerë sërish të premten, pasi deputetët e Partisë Demokratike të Kosovës (PDK) lëshuan sallën e Kuvendit, përcjell albinfo.ch.

Shkak për ndërprerjen u bë mosvotimi i Vlora Çitakut, kandidate e PDK-së për nënkryetare të Kuvendit. Deputetët e Vetëvendosjes abstenuan në votimin për të.

Kryetarja e Kuvendit, Albulena Haxhiu, e ftoi PDK-në të bëjë një propozim tjetër, por kjo parti nuk paraqiti kandidat të ri. Pas kësaj, Haxhiu e ndërpreu seancën, duke bërë të ditur se për vazhdimin e saj do të njoftohen deputetët më vonë.

Paraprakisht, me 101 vota për, Ardian Gola nga Vetëvendosje ishte zgjedhur nënkryetar i Kuvendit nga radhët e këtij subjekti politik.

Ndërkohë, Kuvendi i Kosovës ka njoftuar se seanca konstituive do të vazhdojë sot në orën 14:00. Në rendin e ditës është pika “Zgjedhja e nënkryetarëve”.

Deputetja e LDK-së, Hykmete Bajrami, ka reaguar pas ndërprerjes së seancës, duke thënë se një nga punët e para të Kuvendit duhet të jetë jetësimi i nismës së Institutit të Kosovës për Drejtësi (IKD) për kriminalizimin e shkeljes së Kushtetutës.

“Është urgjencë kombëtare të shpëtohet ky shtet”, ka shkruar Bajrami në Facebook, duke akuzuar kryetarin e LVV-së, Albin Kurti, se po synon ta rrënojë shtetin.

Nga ana tjetër, deputetja e LDK-së, Jehona Lushaku-Sadriu, ka thënë se pret që pas konsultimeve, deputetët të rikthehen në sallë dhe të vazhdojnë procesin e konstituimit.

“Besojmë që propozimi i kandidatëve për nënkryetar i takon partisë. E njohim këtë parim duke e zbatuar edhe për partitë e tjera. Ne i përkrahëm të gjitha propozimet e partive. Pres që gjithsesi pas konsultimeve, të kthehemi në seancë dhe ta vazhdojmë konstituimin. Konstituimi është tepër i rëndësishëm”, ka thënë ajo.

Lushaku-Sadriu ka shtuar se ishte Vetëvendosje ajo që kishte shprehur mospajtim lidhur me votimin e kandidatëve për nënkryetarë të propozuar nga partitë e tjera./Albinfo.ch

---