Mundësit historikë të Shqipërisë: Herën e ardhshme luftojmë për të artën

“Shqipëria, në zemrën time”, tha Chermen Valiev, ndërsa Dudaev u shpreh: “Jam i lumtur për këtë rezultat. Herën tjetër luftojmë të marrim medalje ari”

Shqipëria shkroi historinë teksa në Lojërat Olimpike të Parisit arriti të koleksionojë dy medaljet e para.

Chermen Valiev dhe Islam Dudaev janë futur në histori si medalistët e parë për Shqipërinë në Lojërat Olimpike, transmeton albinfo.ch.

Por kush janë dy kampionët e mundjes së stilit të lirë që po shkëlqejnë me flamurin kuqezi dhe cilët janë profilet e tyre?

Valiev, 25 vjeç nga Osetia Veriore, vetëm pak muaj më parë u pajis me pasaportë shqiptare, duke i mbyllur procedurat në kohë rekord, për të siguruar në limite edhe kualifikimin për në “Paris 2024” në turneun botëror që u mbajt në Turqi. Para se të vishej kuqezi, Valiev ka përfaqësuar Rusinë, ndërsa rezultatet e tij më të mëdha kanë qenë tituj kampionë Bote dhe Evrope për moshat U-23.

Për sa i përket Islam Dudaevit, ai është pjesë e Shqipërisë që prej vitit 2022, i veshur kuqezi njëkohësisht me Zelimkhan Abakarovin. Dudaev, 29 vjeç, ka lindur në Dagestan, ndërsa para se të konkurronte me Shqipërinë, arritjet e tij më të mëdha me Rusinë janë dy medalje bronzi në Botërorin U-23. Me flamurin kuqezi sukseset kanë qenë më të shumta, pasi Dudaev është shpallur kampion i Evropës gjatë këtij viti, ndërsa ka fituar medalje bronzi në Evropianin 2022 dhe në Lojërat Mesdhetare “Oran 2022”. Gjithashtu regjistron suksese të ndryshme në turnetë ndërkombëtarë “Grand Prix”.

Pas pritjes në Tiranë, të dy ata folën për këtë arritje, duke shpresuar që në Lojërat e tjera Olimpike të arrijnë një sukses dhe më të madh.

“Shqipëria, në zemrën time”, tha Chermen Valiev, ndërsa Dudaev u shpreh: “Jam i lumtur për këtë rezultat. Herën tjetër luftojmë të marrim medalje ari”.

 

---