Ministria e Diasporës i dhuron libra shqip bibliotekës zvicerane

"Është kënaqësi e madhe që po dhurojmë libra por kënaqësia do të jetë edhe më e madhe kur këta libra do të lexohen”, u shpreh konsulli Sefa

Të enjten, më 7 qershor, konsulli i Kosovës dr. Sali Sefa me stafin e tij pati një angazhim që dallonte nga rutina e punës së përditshme konsullore. Në vend të plotësimit të formularëve, dhënies së pasaportave dhe dokumenteve tjera, ky staf po përmbushte një detyrim tjetër: dorëzimin e librave në gjuhën shqipe në një bibliotekë zvicerane.

Bëhet fjalë për realizimin e nismës së ministrit të diasporës, Ibrahim Makolli për t`i dorëzuar një numër librash bibliotekës Pestalozi në Hardau të Cyrihut, që drejtohet nga shqiptarja Suela Jorgaqi.

Sot po i dorëzojmë bibliotekës “Pestalozi” një kontigjent prej më shumë se 1200 librash. Është kënaqësi e madhe që po e bëjmë dorëzimin por kënaqësia do të jetë edhe më e madhe kur këta libra do të lexohen”, u shpreh konsulli Sefa në ceremoninë modeste të dorëzimit të librave. Kënaqësinë e shtonte ehde fakti se biblioteka drejtohet tashmë nga një shqiptare.

Librat që po i dhurojmë janë të zhanreve tëndryshme; ka romane, libra historikë, monografi etj. “Por, në përgjithësi, të gjithë janë libra të rinj” thotë Sefa.

Foto galeri

Dr. Sefa njofton me tutje edhe për një dhuratë tjetër në trajtë librash që Ministria e Diasporës i ka bërë mërgatës në Zvicër. “Nga ministria ne na janë dorëzuar 16 pako me nga 1310 copë libra secila, të dedikuara për nxënësit shqiptarë këtu. Organizimin e shpërndarjes e kemi marrë ne si konsullatë, dhe do t`ua japim në dorëzim qendrave të LAPSH-it nëpër kantone”, përfundon konsulli i Republikës së Kosovës në Cyrih, Sali Sefa, i cili në këtë mision shoqërohej edhe nga zëvendëskonsullja Ajmone Veseli.

Ndërsa drejtoresha Jorgaqi thotë se pa këtë kontigjent të ri librash, biblioteka që drejton ajo ka mbi 2000 libra shqip. Por, sqaron ajo, në këtë numër hyjnë edhe cd, dvd, broshura e publikime tjera, të të gjithë zhanreve. Lidhur me numrin e lexuesve shqiptarë që frekuentojnë bibliotekën, Jorgaqi thotë se nuk ka ndonjë shifër të saktë, por interesimi ekziston. “Ka më shumë fëmijë që vijnë për të marrë libra, por pastaj, nëpërmjet tyre vijnë edhe prindërit”, shton ajo.