Mbi 10 mijë viktima në Evropë si pasojë e valës së fortë të të nxehtit

Keystone (AP Photo/Manu Fernandez)

Një valë e pazakontë e të nxehtit që goditi Evropën Perëndimore në fund të muajit qershor ka shkaktuar mbi 10 mijë vdekje, sipas të dhënave të rrjetit evropian të monitorimit të vdekshmërisë, EuroMOMO, i cili mbështetet nga Qendra Evropiane për Parandalimin dhe Kontrollin e Sëmundjeve (ECDC) dhe Organizata Botërore e Shëndetësisë (OBSH).

Sipas statistikave, më shumë se 9 mijë nga viktimat ishin persona të moshës 65 vjeç e lart, grupi që konsiderohet më i ndjeshëm ndaj temperaturave ekstreme. Nxehtësia e lartë mund të shkaktojë goditje nga vapa, si edhe të përkeqësojë sëmundjet kronike të zemrës dhe mushkërive.

Lasse Vestergaard, mjek kryesor në Institutin Shtetëror të Serumit në Danimarkë, theksoi se një numër kaq i lartë vdekjesh në këtë periudhë të vitit është i pazakontë dhe se është e vështirë të gjendet një shpjegim tjetër përveç ndikimit të temperaturave ekstreme.

Ekspertët e klimës vlerësojnë se kjo valë e të nxehtit nuk do të kishte ndodhur në këtë intensitet pa ndikimin e ndryshimeve klimatike të shkaktuara nga aktiviteti njerëzor, të cilat po i bëjnë episode të tilla më të shpeshta dhe më të rënda.

Të dhënat janë mbledhur nga 27 vende evropiane dhe përfshijnë të gjitha shkaqet e vdekjeve, jo vetëm ato të lidhura drejtpërdrejt me nxehtësinë. Ato i referohen periudhës 22–28 qershor, kur temperaturat arritën nivelet më të larta në Francë, Spanjë, Mbretërinë e Bashkuar dhe vende të tjera të Evropës Perëndimore.

Studiuesit nuk kanë identifikuar faktorë të tjerë të rëndësishëm, si shpërthime të COVID-19 apo epidemi të tjera, që mund të justifikonin rritjen e vdekshmërisë në rreth 10 650 raste gjatë asaj jave. Përkundrazi, gjatë tetë javëve para valës së të nxehtit, numri i vdekjeve kishte qenë mesatarisht rreth 500 më i ulët se niveli normal.

Megjithatë, EuroMOMO thekson se shifrat mund të përditësohen në javët në vijim, pasi priten raportime shtesë nga shtetet pjesëmarrëse.

Përveç ndikimit në shëndetin publik, vala e nxehtësisë shkaktoi edhe probleme në furnizimin me energji elektrike, mbylljen e shkollave dhe vendosjen e rekordeve të reja të temperaturave në Francë, Spanjë dhe Mbretërinë e Bashkuar.

Sipas EuroMOMO, Franca dhe Belgjika ishin të vetmet vende që regjistruan një nivel “shumë të lartë” të vdekshmërisë gjatë javës së fundit të qershorit. Në Belgjikë, kjo ishte rritja më e madhe e vdekjeve gjatë një vale të nxehti që nga viti 2000, sipas institutit kombëtar të shëndetit publik Sciensano.

Ndërkohë, një studim i publikuar së fundmi vlerëson se rreth 2 700 persona humbën jetën në Angli dhe Uells gjatë valëve të të nxehtit të muajve maj dhe qershor. Hulumtimi, i realizuar nga Kolegji Imperial i Londrës, Zyra Meteorologjike Britanike dhe Shkolla e Higjienës dhe Mjekësisë Tropikale në Londër, arriti në përfundimin se 42% e këtyre vdekjeve lidhen me rritjen e temperaturave të shkaktuara nga ngrohja globale.