LDK-ja do ta votojë çdo kandidat të VV-së për kryetar të Kuvendit

Lutfi Haziri: Kandidati i VV-së për kryetar të Kuvendit dhe nënkryetarët duhet të marrin mbështetjen e deputetëve

Nënkryetari i Lidhjes Demokratike të Kosovës (LDK), Lutfi Haziri, ka bërë të ditur se deputetët e kësaj partie do të marrin pjesë në vazhdimin e seancës konstituive të Kuvendit, përcjell albinfo.ch.

Haziri ka deklaruar se LDK-ja do ta mbështesë me votë kandidatin e Lëvizjes Vetëvendosje (VV) për kryetar të Kuvendit, pavarësisht se kush do të jetë emri i propozuar, si dhe kandidatët për nënkryetarë të Kuvendit.

“Ne si LDK e votojmë”, ka deklaruar Haziri.

Duke folur në emisionin “Politiko” në Kanal 10, Haziri ka theksuar se ai vazhdimisht ka qenë në favor të marrëveshjeve politike, bashkëpunimit dhe koordinimit ndërmjet subjekteve politike.

“Unë jam kanë pro marrëveshjeve dhe bashkëpunimit, të koordinimit sa ma të mirë. Kështu që nesër, natyrshëm, duhet me kalu kandidati i VV-së për kryetar të Kuvendit, kushdo që është, dhe nënkryetarët që vijnë nga secila parti”, ka deklaruar ai.

Deklarata e Hazirit vjen në prag të vazhdimit të seancës konstituive të Kuvendit, ku pritet të hidhen në votim kandidaturat për drejtimin e këtij institucioni./Albinfo.ch

---