LAPSH bën thirrje për të mos u braktisur shkollat shqipe në Bavari

Mësimi i gjuhës shqipe nga fëmijët shqiptarë në Bavari po përcillet me sfida, sidomos gjatë kohës së pamdemisë

Mësuesit e prindërit shqiptarë në Republikën e Bavarisë shprehin shqetësim për uljen e numrit të fëmijëve që mësojnë gjuhën amtare.

Prandaj, në vigjilje të nisjes së një viti të ri shkollor, ata kanë bërë thirrje për pjesëmarrje më të lartë.

“Të dashur nxënës, mësimdhënës, këshilla të prindërve dhe prindër, që jetoni dhe veproni në Republikën e Bavarisë, ju dëshirojmë një vit të mbarë shkollor 2021/22, në mësimin plotësues në gjuhën shqipe”, nis njoftimi i Lidhjes së Arsimtarëve dhe Prindërve Shqiptarë në Bavari (LAPSH).

Kryesia e LAPSH-it bën thirrje që së bashku “të angazhohen në rritjen e numrit të nxënësve në shkollat shqipe në Republikën e Bavarisë. “Kjo rritje e numrit të nxënësve dhe hapja e klasave të reja jo vetëm që na nderon si komunitet shqiptar, por mbi të gjitha i ruajmë fëmijët nga asimilimi, humbja e vlerave kombëtare e ato kulturore”, thuhet në reagim.

“Bashkëkombës, kudo që jeni, biznese e shoqata”, theksojnë ata në njoftim, “duhet të bëheni të gjithë së bashku në interes të shkollës shqipe, në ruajtjen e gjuhës amtare dhe të kulturës, të kësaj vlere sublime, e cila na identifikon qenien tonë kombëtare”, vazhdon më tutje reagimi, transmeton Albinfo.ch.

---