Kuvendi i Kosovës, të hënën seancë të jashtëzakonshme për ‘gylenistët’

Lëvizja Vetëvendosje dhe Lidhja Demokratike e Kosovës kanë dorëzuar kërkesën për seancë të jashtëzakonshme lidhur me raportin e Komisionit hetimor parlamentar për 6 shtetasit turq.
Deputeti i Lëvizjes Vetëvendosje, Xhelal Sveçla, njëherësh kryetar i Komisionit hetimor parlamentar dhe Driton Selmanaj, deputet i Lidhjes Demokratike të Kosovës dhe nënkryetar i këtij komisioni, dorëzuan kërkesën për mbajtjen e seancës së jashtëzakonshme parlamentare për të shqyrtuar e votuar raportin me gjetjet e komisionit, transmeton albinfo.ch.
“31 shkeljet e gjetura nga ky komision hetimor dhe raporti i plotë janë miratuar nga vetë Komisioni hetimor, por për shkak të zvarritjes nga Kryesia e Kuvendit, ende nuk kanë dalë në rend të ditës në seancë të rregullt. Në këto kushte, deputetët iniciues dhe deputetët nënshkrues dorëzuan sot kërkesën zyrtare për seancë të jashtëzakonshme”, thuhet në njoftim.
Kërkesën që seanca të mbahet të hënën, më 24 qershor, në orën 11:00, e ka aprovuar Kryesia e Kuvendit.
Kuvendi njofton se pika e vetme e rendit të ditës është shqyrtimi i raportit të Komisionit hetimor parlamentar lidhur me rastin e dëbimit të gjashtë (6) shtetasve turq më 26 mars 2018″.