Kurti takohet me zyrtarë të lartë në Irlandën e Veriut

Kryeministri i Republikës së Kosovës, Albin Kurti, dhe zëvendësministrja e Punëve të Jashtme dhe Diasporës, znj. Liza Gashi, zhvilluan një vizitë dyditore në Irlandën e Veriut, përcjell albinfo.ch.

Ata u takuan me ministren e Parë, Michelle O’Neill, zëvendësministren e Parë, Emma Little-Pengelly, me Kryetarin e Parlamentit të Irlandës Veriore, Edwin Poots dhe me liderin e opozitës në Irlandën Veriore, Socialdemokratin Matthew O’Toole.

Po ashtu vizituan edhe dy institucionet arsimore, shkollën Nettlefield dhe “Queens University” në Belfast, ku Kryeministri Kurti ligjëroi dhe mori pjesë në diskutimin e zhvilluar më temën “Shtetndërtimi në Kosovë: Sfidat dhe mundësitë”.

Pastaj vazhduan vizitën me një takim me Sekretarin e Shtetit për Irlandën Veriore, Chris Heaton-Harris, në kështjellën historike “Hillsborough Castle”, ku Sekretari i Shtetit jeton dhe punon.