Kundër abortimeve me bazë gjinore

Kërkohet nga Këshilli Federal që t`i precizojë kërkesat që lidhen me kontrollimet prenatale në mënyrë që të reduktohet rreziku i keqpërdorimit

Këshilli Federal i Zvicrës duhet të veprojë kundër abortimeve të fëmijëve kur ato bëhen vetëm duke u nisur nga gjinia e fëmijës.
Fjala është për dukurinë kur prindërit, pasi ta marrin vesh gjininë e fëmijës në trupin e nënës, vendosin ta abortojnë atë nëse është i gjinisë së caktuar, kryesisht i gjinisë femërore.

Këtë veprim nga qeveria e vendit e ka kërkuar Komisioni shkencor i Dhomës Nacionale të Parlamentit të Zvicrës. Kjo kërkesë, në formë mocioni është përkrahur më parë nga Dhoma e Kantoneve e Parlamentit.

Në këtë mocion kërkohet nga Këshilli Federal që t`i precizojë kërkesat që lidhen me kontrollimet prenatale (para lindjes) në mënyrë që të reduktohet rreziku i keqpërdorimit.

Edhe sot është e ndaluar që kontrollimi prenatal të bëhet me qëllimin për të kuptuar gjininë e fëmijës. Por rreziku i abuzimit ekziston kur gjinia e fëmijës konstatohet vetëm si gjetje anësore dhe kjo u tregohet prindërve.