Ku po krijohen vendet e reja të punës në Gjermani?

Aktualisht në Gjermani janë rreth 45.6 milionë persona në marrëdhënie pune, ndërsa papunësia është rritur vetëm lehtë.

Megjithëse koncernet e mëdha gjermane vazhdojnë të njoftojnë shkurtime të vendeve të punës, tregu i punës në Gjermani po pëson një transformim të thellë. Vendet e humbura në industri po zëvendësohen gradualisht me vende të reja pune në sektorin e shërbimeve, përcjell albinfo.ch.

Sipas analizës së Deutsche Welle, brenda një viti industria ka humbur rreth 185 mijë vende pune, ndërsa pothuajse po aq, rreth 181 mijë vende të reja, janë krijuar në shëndetësi, arsim dhe administratë publike. Kjo tregon se ekonomia gjermane po largohet gradualisht nga modeli tradicional i bazuar te prodhimi industrial dhe po mbështetet gjithnjë e më shumë te sektori i shërbimeve.

Pavarësisht sfidave ekonomike, numri i të punësuarve mbetet pothuajse i pandryshuar. Aktualisht në Gjermani janë rreth 45.6 milionë persona në marrëdhënie pune, ndërsa papunësia është rritur vetëm lehtë. Sipas ekspertëve, ekonomia gjermane nuk ndodhet në kolaps, por po kalon një fazë të rëndësishme transformimi.

Analistët vlerësojnë se investimet publike, fuqia e lartë punëtore dhe sistemi i zhvilluar arsimor vazhdojnë të mbështesin ekonominë. Megjithatë, ndryshimet në tregtinë globale, konkurrenca nga Kina dhe plakja e popullsisë po e detyrojnë Gjermaninë të përshtatet me një model të ri ekonomik dhe të tregut të punës.

---