Kosovë: Avokati i Popullit kërkon pezullimin e rritjes së çmimit të energjisë

KESCO

Avokati i Popullit i ka kërkuar Zyrës së Rregullatorit për Energji (ZRRE) që të pezullojë vendimin për rritjen e çmimit të energjisë elektrike, derisa të përfundojnë hetimet mbi ankesat e shumta të qytetarëve që kanë arritur në këtë institucion, shkruan albinfo.ch.

Në reagimin e bërë publik, Avokati i Popullit ka shprehur shqetësim të thellë për ndikimin ekonomik të këtij vendimi ndaj qytetarëve, duke theksuar se ai cenon të drejtat themelore të njeriut dhe rëndon në mënyrë të veçantë mbi grupet më të cenueshme të shoqërisë, përfshirë familjet që jetojnë me asistencë sociale.

Sipas tij, rritja e tarifave është marrë në një moment boshllëku institucional, kur vendi nuk ka pasur Kuvend të konstituuar dhe as Qeveri të mandatuar. Ai e ka cilësuar këtë si mungesë të debatit institucional dhe publik mbi një çështje që prek një shërbim bazë dhe jetik për qytetarët — energjinë elektrike, shkruan albinfo.ch.

“Qeveria e Kosovës, në përputhje me Ligjin për Energjinë Elektrike, ka për detyrë të garantojë interesin publik, qasje të barabartë dhe përfshirje sociale në politikat energjetike”, thuhet në deklaratë.

Avokati i Popullit ka theksuar se vendime të tilla duhet të merren vetëm kur institucionet janë funksionale dhe të koordinuara për të mbrojtur interesin e përgjithshëm të qytetarëve. Ai ka bërë thirrje për rritje të transparencës dhe përgjegjësisë nga ZRRE-ja, si dhe për bashkëpunim më të ngushtë me institucionet tjera shtetërore, sidomos në vendimmarrje që prekin interesin publik në mënyrë të gjerë.

Vendimi për shtrenjtimin e energjisë, që parashihet të hyjë në fuqi nga 1 maji, do të rrisë çmimin e rrymës për 16.1 për qind — një rritje që tashmë ka shkaktuar reagime të forta në publik dhe kërkesa për masa urgjente nga institucionet, transmeton albinfo.ch.