Kosovarët, të katërtit në listën e të huajve në Kantonin e Cyrihut

Sipas statistikës më të re, ata vijnë pas gjermanëve, italianëve dhe portugezëve

Kantoni i Cyrihut me 1‘443‘000 banorë është kantoni më i madh në Zvicër sa i përket numrit të banorëve. Po ashtu edhe numri i të huajve që jetojnë këtu është më i madh se në kantonet tjera. Në fund të vitit 2014, sipas Entit të Statistikës në Kantonin e Cyrihut jetonin 370 mijë persona me shtetësi të huaj, duke përbërë 25.7 për qind të popullatës së gjithëmbarshme. Statistika e publikuar të premten tregon për një rritje prej 0.5% (ose plus 22.000) të këtij numri në krahasim me vitin paraprak.

Nga ky numër i të huajve 67 për qind vijnë nga shtetet e BE-së ose të EFTA-s, 18 për qind nga shtetet tjera të Evropës dhe 15% nga vendet tjera të botës.

Më së shumti të huaj ka nga Gjermania, 86.000 dhe nga Italia 51.000 persona. Pas tyre vijnë portugezët me 27.000. Të dhënat e publikuara nga Enti i Statistikës nuk e specifikojnë numrin e kosovarëve në këtë kanton por vetëm shënojnë se ata zënë vendin e katërt pas portugezëve. Ndërsa në një statistikë pak më të vjetër, të po këtij enti del se në fund ë vitit 2013 kosovarët me 16.700 veta ishin në vendin e katërt të komuniteteve jozvicerane.

Por nga kjo nuk mund të përfundohet me siguri se kosovarët, respektivisht shqiptarët në përgjithësi janë në numër kaq të vogël. Duhet ditur se një numër kosovarësh kanë ende shtetësi serbe dhe nga ana tjetër shqiptarët e Maqedonisë, Luginës së Preshevës, Shqipërisë dhe Malit të Zi llogariten veçmas shtetasve të Kosovës. Kur kësaj t`i shtojmë edhe valën e madhe të shqiptarëve që viteve të fundit kanë marrë shtetësinë zvicerane, numri i komunitetit shqiptar në Kantonin e Cyrihut duhet të dalë dukshëm më i madh se ky që figuron këtu.

Pas kosovarëve, me radhe vijnë shtetasit e Turqisë, Serbisë, Maqedonisë, Spanjës dhe Austrisë.