Kompanitë nga Kosova promovojnë produktet në Gjermani

Kosovo Investment and Enterprise Support Agency - KIESA

Kompanitë nga Kosova të industrisë së drurit nga data 04 qershor janë duke promovuar produktet e tyre në panairin “IMM – Spring Edition” që po mbahet në Koln të Gjermanisë, përcjell albinfo.ch.

ELNOR, MERCOM, TIKI DESIGN, PROMBI, TREVENTI DHE HBAH HOTI,  po i ekspozojnë produktet e tyre, si: tavolina, karrige, dyer, dritare, kuzhina, dhoma gjumi, divane dhe produkte të tjera nga druri në këtë panair, i cili këtë vit në fokus ka inovacionin dhe kreativitetin në industrinë e drurit.

“Pjesëmarrja e kompanive kosovare në këtë panair është organizuar nga Ministria e Industrisë, Ndërmarrësisë dhe Tregtisë (MINT), përkatësisht Agjencia për Investime dhe Përkrahjen e Ndërmarrjeve në Kosovë (KIESA), në bashkëpunim me Shoqatën e Përpunuesve të Drurit të Kosovës (SHPDK), në mbështetje të Caritas dhe USAID Kosovo Compete Activity dhe jep një mundësi e mirë për kompanitë tona që të zhvillojnë kontakte me kompanitë pjesëmarrëse dhe me blerës potencialë me synim të krijimit të bashkëpunimit dhe rritjes eksportit”, thuhet në njoftim.

Mes tjerash, më 05.06.2023, në kuadër të këtij panairi organizohet aktiviteti “KOSOVA DAY”, që ka për qëllim promovimin e kompanive tona pjesëmarrëse në panair dhe të mbledhë blerës të huaj.

“Më 06.06.2023 do të zhvillohen takimet B2B në mes bizneseve vendore, bizneseve të huaja dhe atyre nga diaspora. Ngjarja është bashkëorganizuar nga institucionet dhe organizatat pjesëmarrëse. Sektori i përpunimit të drurit në Kosovë është konkurrues si dhe kontribuon me rreth 21% në totalin e eksporteve. Destinacionet kryesore të eksportit janë: Gjermania, Austria, Zvicra dhe vendet e Ballkanit Perëndimor”, thuhet tutje, përcjell albinfo.ch.

Shtandi i Republikës së Kosovës në këtë panair gjendet në Hall 05.2 Stand Nr. B-001g A-002g. Panairi “IMM – Spring Edition” është i hapur deri më 07 qershor 2023.