Kompanitë nga Kosova prezantojnë produktet në panairin ndërkombëtar të industrisë së modës në Turqi

Nëntë kompani kosovare marrin pjesë në “IF Wedding Fashion Izmir Fair 2026”, me mbështetjen e MINT/KIESA

Kompanitë nga Kosova po vazhdojnë të forcojnë prezencën e tyre në tregjet ndërkombëtare, duke prezantuar produktet dhe krijimet e tyre në një nga panairet më prestigjioze të industrisë së modës. Me mbështetjen e Ministrisë së Industrisë, Ndërmarrësisë dhe Tregtisë (MINT) përmes KIESA-s, nëntë kompani kosovare po marrin pjesë në panairin ndërkombëtar “IF Wedding Fashion Izmir Fair 2026”, i cili po mbahet nga 20 deri më 22 janar 2026 në Izmir të Turqisë, transmeton albinfo.ch.

Në këtë ngjarje të rëndësishme për industrinë globale të modës, kompanitë kosovare Walone Fashion Group L.L.C, Baron-A Sh.P.K., D.P.Z. Atelea Vlora & Kaltrina, Minna Sh.P.K., Tabja 1 Sh.P.K., Diba Celina B.I., Zana Ardi Exclusive Sh.P.K., Blini BFH Sh.P.K. dhe Flurimi Sh.P.K. po prezantojnë koleksionet dhe krijimet e tyre përkrah rreth 200 brendeve ndërkombëtare.

Pjesëmarrja në një panair të këtij niveli u krijon mundësi të rëndësishme kompanive kosovare nga sektori i tekstilit dhe modës për të zgjeruar rrjetin e bashkëpunimeve ndërkombëtare, për të depërtuar në tregje të reja dhe për të fituar përvojë në një konkurrencë globale. Njëkohësisht, kjo paraqet një platformë të rëndësishme për promovimin e kulturës, dizajnit dhe kreativitetit kosovar në skenën botërore të modës.

Panairi “IF Wedding Fashion Izmir Fair 2026” ka tërhequr një audiencë të gjerë prej rreth 20 mijë vizitorësh nga mbarë bota, përfshirë blerës profesionistë, stilistë të njohur, përfaqësues të mediave të specializuara dhe ekspertë të industrisë së modës.

Në kuadër të këtij panairi, Kosova ka siguruar një hapësirë ekspozuese të dedikuar për prezantimin e nëntë kompanive prodhuese vendore, në një sipërfaqe totale prej 585 metra katrorë, duke reflektuar seriozitetin dhe potencialin e sektorit kosovar të modës.

Panairi do të jetë i hapur për vizitorë deri më 22 janar 2026, ndërsa pjesëmarrja e kompanive kosovare vlerësohet si një hap i rëndësishëm drejt rritjes së eksportit dhe ndërkombëtarizimit të produkteve vendore./Albinfo.ch

---