Kamberi kërkon përfshirjen e çështjes së shqiptarëve të Luginës në dialogun Kosovë-Serbi

Deputeti shqiptar Shaip Kamberi ka depozituar në Parlament një rezolutë që synon të sigurojë njohjen dhe pranimin nga Kuvendi i Serbisë të diskriminimeve ndaj shqiptarëve në komunat Preshevë, Bujanoc dhe Medvegjë. Rezoluta kërkon përkushtim institucional për përmirësimin e pozitës së tyre, në përputhje me standardet ndërkombëtare dhe detyrimet për integrim në BE.

Kamberi thekson se përpjekjet e deritanishme nuk kanë sjellë rezultatet e pritura, ndaj propozon që kjo çështje të trajtohet gjatë dialogut ndërmjet Kosovës dhe Serbisë.

“Miratimi i kësaj rezolute do të tregojë vullnet politik për adresimin e sfidave të vazhdueshme dhe për të siguruar barazi për të gjithë qytetarët, pavarësisht përkatësisë etnike, që është bazë për zhvillim demokratik dhe integrim evropian,” shkruan Kamberi në Facebook.

Në rezolutë përmenden probleme të rëndësishme si pasivizimi arbitrar i adresave, mosnjohja e diplomave nga Kosova, mungesa e përfaqësimit proporcional në institucione, pengesa në përdorimin zyrtar të gjuhës shqipe dhe simboleve kombëtare, si dhe zhvillimi i dobët ekonomik i rajonit.

Rezoluta kërkon zbatimin e marrëveshjeve të vitit 2001, 2009 dhe 2013, ndalimin e praktikave administrative që cenojnë të drejtat qytetare, respektimin e plotë të të drejtave gjuhësore dhe arsimore, përfaqësim institucional proporcional, ndëshkimin e gjuhës së urrejtjes dhe krijimin e fondeve zhvillimore me mbështetje shtetërore dhe ndërkombëtare.

Gjithashtu, propozohet formimi i një trupi parlamentar me pjesëmarrjen e OSBE-së, organizatave civile dhe përfaqësuesve shqiptarë, për të hetuar rastet e pasivizimeve dhe ndryshimit të strukturës etnike në këto komuna.