I dyshuari për sulmin në Aarau ishte diagnostikuar me skizofreni, flasin prindërit

(KEYSTONE/Michael Buholzer)

Prindërit e 43-vjeçarit të dyshuar për sulmin me armë në Aarau të Zvicrës kanë konfirmuar se djali i tyre ishte diagnostikuar me skizofreni rreth 20 vjet më parë. Ata u kanë kërkuar falje familjeve të viktimave.

Julien G. dyshohet se ka qëlluar rreth 40 herë drejt një turme njerëzish pas një feste technoje në Aarau. Nga sulmi humbi jetën 22-vjeçarja Maria S., ndërsa gjashtë persona të tjerë u plagosën.

I dyshuari u arrestua nga policia në kantonin Jura, më pak se një ditë pas ngjarjes.

Në një intervistë për gazetën zvicerane “Le Quotidien Jurassien”, prindërit e tij thanë se djali kishte jetuar prej vitesh i izoluar dhe se ata ishin ndër të paktët persona me të cilët kishte kontakte.

Sipas babait, Julien G. ishte diagnostikuar me skizofreni dhe në vitin 2007 kishte qëndruar rreth tre javë në një klinikë psikiatrike në Delémont.

Prindërit thanë gjithashtu se ai nuk kishte shfaqur më parë dhunë ndaj familjes. Ata e kishin parë për herë të fundit një ditë para sulmit, ndërsa kishin planifikuar të takoheshin në Itali për pushime familjare.

“Mendimet tona janë me viktimat, familjen e vajzës që humbi jetën dhe të plagosurit. Është e tmerrshme. Kërkojmë falje për djalin tonë”, deklaruan prindërit.

Hetimet për sulmin, motivin dhe rrethanat e ngjarjes janë ende në zhvillim.